1Cor 3 | BOJ | STEP | O was qu, e nuŋgo ambleq di soqnem bati deqa niŋgi Kristus aqa kumbra geregere qalieosaisoqneb deqa niŋgi aŋgro mom bul soqneb. Deqa anjam e na tamo uŋgasari Qotei aqa Mondor dauryeqnub qaji naŋgi minjreqnum di niŋgi olo merŋgwa keresai. Anjam e na tamo uŋgasari naŋgo areqalo namij dauryeqnub qaji naŋgi minjreqnum di segi niŋgi merŋgoqnem.

1 Corinthians 3

Pol wo Apolos wo naŋgi Qotei aqa wau tamo bole

1 O was qu, e nuŋgo ambleq di soqnem bati deqa niŋgi Kristus aqa kumbra geregere qalieosaisoqneb deqa niŋgi aŋgro mom bul soqneb. Deqa anjam e na tamo uŋgasari Qotei aqa Mondor dauryeqnub qaji naŋgi minjreqnum di niŋgi olo merŋgwa keresai. Anjam e na tamo uŋgasari naŋgo areqalo namij dauryeqnub qaji naŋgi minjreqnum di segi niŋgi merŋgoqnem. 2 Niŋgi aŋgro mom bul soqneb deqa niŋgi damu siŋgila uyqa keresai. Deqa e na niŋgi damu anaiŋgosaioqnem. E na niŋgi muŋgum anaiŋgoqnem. Agi bini niŋgi damu uyqa keresai unub. 3 Di kiyaqa? Niŋgi nuŋgo areqalo namij dauryeqnub deqa. Agi niŋgi nuŋgo was naŋgi qa are ugeiŋgeqnaqa ombla anjam na qotoqnsib laqnub. Nuŋgo kumbra di jejamu qa kumbra uge. Di mandam qaji tamo naŋgo kumbra. 4 Agi nuŋgo ambleq di tamo qudei naŋgi mareqnub, “E Pol dauryo qaji tamo.” Ariya niŋgi qudei mareqnub, “E Apolos dauryo qaji tamo.” O was qu, nuŋgo kumbra di mandam qaji tamo naŋgo kumbra.

5 Apolos di tamo yai? E Pol e segi tamo yai? Aqo aiyel Qotei aqa wau tamo segi. Agi Tamo Koba Qotei na aqo aiyel wau segi segi egej deqa iga Kristus aqa anjam niŋgi merŋgoqnem. Onaqa niŋgi quoqnsib Kristus qa nuŋgo areqalo siŋgilateb. 6 E wauq di iŋgi yagem. Apolos a na wau taqatoqnej. Ariya Qotei a segi na iŋgi boleteqnu. 7 Deqa tamo a iŋgi yageqnu qaji a ñam saiqoji. Tamo a wau taqateqnu qaji a dego ñam saiqoji. Ariya Qotei iŋgi boleteqnu qaji a segi ñam koba ti. 8 Tamo a iŋgi yageqnu qaji wo tamo a wau taqateqnu qaji wo naŋgi aiyel ombla Qotei aqa wau ojeqnub. Ariya mondoŋ Qotei a na naŋgo wau segi segi pegiyosim awai enjrqas. 9 Aqo aiyel Qotei ombla na wau ojeqnum. Qotei aqa iŋgi wau agi niŋgi segi.

Qotei aqa wau tamo naŋgi tal gereiyo qaji tamo bul

Niŋgi segi Qotei aqa tal bul a na gereiyej qaji. 10 Qotei a e qa are boleiyosiq wau ebej deqa e tal gereiyo qaji tamo bulosim e tal gereiyqajqa qalie bole. Deqa e tal aqa utru atem. Ariya bini tamo qudei naŋgi kamba olo tal aqa ai gogeq di tal ateqnub. Ariya e na tamo kalil naŋgi endegsi minjreqnum, “Niŋgi tal ateqnub deqa niŋgi geregere atoqniye.” 11 O was qu, niŋgi qalie, Qotei a na Yesus Kristus osiq a tal aqa ai tuma qaji bul tigeltej unu. Deqa tamo bei na olo tal aqa ai tuma qaji bei ataiq. 12 Tamo naŋgi tal aqa ai gogeq di tal atqa osibqa gol na ti silva na ti meniŋ naimyo na ti ŋamtaŋ na ti liki na ti wit aqa sau na ti tal ateqnub. 13 Ariya mondoŋ tamo naŋgi peginjro batiamqa Qotei na tamo kalil naŋgo wau segi segi boleq atsim ŋamyuo na pegiyosim naŋgo wau bole kio uge kio di unqas. 14 Tamo qudei naŋgo tal ateb qaji di ŋamyuo na yugwasai di naŋgi awai bole oqab. 15 Ariya tamo qudei naŋgo tal ateb qaji di ŋamyuo na yueleŋqas deqa naŋgo wau kalil torei loumqas. Ariya tamo naŋgi di padalqasai. Naŋgi ŋamyuoq di padalqa jojomoqnib Qotei na naŋgi olo oqas.

Niŋgi Qotei aqa segi tal bul

16 Niŋgi Qotei aqa segi tal bul. Qotei aqa Mondor a nuŋgo miligiq di unu. Di niŋgi qaliesai kio? 17 Qotei aqa tal di aqa segi getento tal. Qotei aqa tal di agi niŋgi segi. Deqa tamo bei na Qotei aqa tal di ugeugeiyqas di Qotei na kamba tamo di ugeugeiyqas.

Niŋgi na tamo naŋgo ñam soqtoqnaib

18 Niŋgi na nuŋgo segi jejamu gisaŋyaib. Nuŋgo ambleq di tamo bei a mandam qaji powo ti sosim endegsi are qalqas, “E segi powo koba ti unum.” Di gisaŋ. Deqa tamo di a mati marqas, “Bole, e powo ti sosai. E nanari tamo.” Degsi marim Qotei na a olo powo yimqa dena a powo bole ti sqas. 19 Di kiyaqa? Tamo naŋgi mandam qaji powo ti unub qaji naŋgi Qotei aqa ŋamgalaq di nanari tamo unub. Agi Qotei aqa anjam bei nami endegsib neŋgreŋyeb unu, “Tamo naŋgi powo ti unub qaji naŋgi naŋgo kumbra uge na tamo qudei naŋgi ugeugeinjrqa are qaleqnub. Deqa Qotei a kamba naŋgo kumbra uge dena naŋgi olo padaltnjreqnu.” 20 Anjam bei dego unu,

“Tamo naŋgi powo ti unub qaji naŋgo areqalo Tamo Koba Qotei a segi qalie.
A qalie, kumbra uge kalil naŋgi yqajqa are qaleqnub qaji di naŋgi yib ugeinjrim padalqab.”
21 Deqa niŋgi na tamo naŋgo ñam soqtoqnaib. Iŋgi iŋgi kalil di nuŋgo. 22 E Pol ti Apolos ti Pita ti mandam ti ŋambile ti moio ti iŋgi iŋgi kalil bini unub qaji naŋgi ti iŋgi iŋgi kalil bunuqna brantqab qaji naŋgi ti di kalil nuŋgo. 23 Ariya niŋgi Kristus aqa. Ariya Kristus a Qotei aqa.